In Christi nomine. Noverint cuncti fideles sanctę Dei ęcclesię, quod ego Beliardis femina, reminiscens peccaminum meorum enormitatem, pro remedio animę mee et senioris mei Wiberti, dono Domino Deo atque Sancto Petro Cluniensi, et monachis ibi sub cura dunni Odilonis degentibus, aliquid de mea hereditate quę mihi jure paterno evenit; et est sita in villa Vissando, scilicet duos mansos cum omnibus eisdem pertinentibus, id est in campis, silvis, pratis, pascuis, vineis, cum omnibus quę ibi habere visa sum, ad integrum transfundo, in perpetuum supradicto apostolo Petro et jam dictis monachis. Qui autem mansi terminantur a mane terra Arlebaldi et Bernardi, a sero terra francorum, per medium autem via publica. Dono etiam alium mansum in villa Buferia, terminatum a mane terra Letaldi, a sero terra Sancti Petri; et in Verneto Lupino unam contaminam atque unum pratum ad supradictum mansum pertinens. Dono iterum quendam exitum in Vissando qui respicit ad mansum Adelelmi. Propter calumpniam autem cujusdam filii mei, nomine Wichardi, comprimendam, dedi ei in commutationem unum mansum qui vocatur Vetula Curtis. S. Beliardis. S. Arlebaldi. S. Bernardi. S. Hugonis.